Eg byrja å tenkja på dette då eg blei merksam på at det like før jul kom ut ei bok der det var trykt noko så unikt som ei offisiell Zelda-tidslinje. Dette var svært. Denne tidslinja har vore hemmeleg i årevis, og det var difor eit sjokk å sjå tidslinja på eit offisielt Nintendo-produkt.

Denne tidslinja gir mange svar, men òg to store, nye spørsmål:

• Kvifor har dei vald å dele tidslinja i tre? Dei fleste teoriar om tidslinja har gått ut frå at det var snakk om to parallelle tidslinjer, basert på at Ocarina of Time har ein del tidsreising og at ein difor har eit hendingsforløp som følger den vaksne Link og eit som følger unge Link … Eg kjenner ikkje detaljane så godt då eg ikkje har runda akkurat det spelet sjølv enno, men du veit kva eg meiner. Men i den offisielle tidslinja har vi TRE parallelle tidslinjer – dei to fansen har snakka om i årevis, og ei tidslinje der Link taper og Ganondorf tar over makta etter Ocarina of Time. Kvifor er denne tidslinja lagt til?
• Kvifor har dei eigentleg vald å offentleggjera denne tidslinja akkurat no? Den har jo alltid vore hemmeleg. Kvifor lettar Nintendo no på sløret og gir oss ei offisiell tidslinje?

… og så skjønte eg at det finst eitt enkelt svar på begge desse spørsmåla. Tre er ikkje eit tilfeldig tal i Zelda-samanheng. For å bruke berre Skyward Sword som døme, fordi det er det eg nettopp har spelt. Link må gjennom tre tempel for å finne Zelda. Når han finn henne, må han deretter gjennom tre prøvar for å få tre dingsar som han kan bruke for å få tilgong til tre nye tempel. Når det er gjort må han få hjelp av tre dragar til å finne tre delar av ein song som han treng for å få tilgong til tempelet der han skal finne alle tre delar av triforcen.

Så når Nintendo no seier at Zelda-tidslinja etter Ocarina of Time består av tre parallelle tidslinjer, trur eg at det berre finst ei mogleg forklaring på akkurat det: Tidslinjene kjem til å spele ei rolle i eit framtidig spel. Eg trur at vi snart kjem til å få eit Zelda-spel der hovudtemaet er dimensjonshopping, og vi har ein Link som i løpet av spelet er nøydt til å besøke to tidslinjer parallelle til si eiga for å samle tre av eittelleranna som han treng for å bekjempe det spelets versjon av Ganondorf. Ein Ganondorf som hadde makt til å øydeleggja alle dei eksisterande tidslinjene, og det difor ville vera viktig for andre Linkar i andre tidslinjer å samarbeide med Link for å nå eit felles mål.

Tygg litt på dette, forresten: Zelda-spela har eksperimentert med ulike grafiske stilar oppgjennom åra, og det er stor forskjell på den teiknefilmaktige Wind Waker og den tilstreba realismen vi finn i Twilight Princess. Kor kult hadde det vore om vi i dette Zelda-spelet har grafikk som er tilnærma lik Skyward Sword, men at dei to andre dimensjonane Link må besøke i løpet av spelet har henholdsvis Wind Waker-grafikk og den hyperrealistiske grafikken vi kunne sjå demonstrert då Nintendo viste fram grafikkmoglegheitene på Wii U?

Men vent, eg har ein teori til. For når på tidslinja skal isåfall eit slikt spel finne stad? Definitivt etter Ocarina of Time, men eg trur det vil vera trygt å gå ut frå at eit sånt spel ville finne stad etter alle andre spel (så langt) på tidslinja. Altså er dette noko som skjer etter Spirit Tracks, etter Four Swords og etter The Adventure of Link. Og her er min teori nummer to: Dette Zelda-spelet kjem til å finne stad i eit Hyrule som er tilnærma lik vår eiga verd i vår tid.

Dette har eg ikkje eigentleg så mange argument for å hevde. Eg trur det er fullt mogleg – teknologien utviklar seg jo gradvis i Zelda-spela, til den grad at Spirit Tracks hadde eit fullt operativt jernbanesystem, og det er openbart at det eksisterer kunnskap om meir avansert teknologi i denne verda då ein allereie lenge før Skyward Sword hadde fullt operative robotar. Men ærleg talt er ikkje dette så mykje noko eg trur som det er noko eg håper.

For heilt ærleg: Hadde det ikkje vore fascinerande å sjå eit Hyrule som låg tett opptil vår eiga tid? At du i opningscutscenen zooma inn på ein storby som til forveksing likna på Tokyo e.l. til du plutseleg la merke til at det blant innbyggjarane var goronar og anoukiar og andre typiske Hyrule-vesen? Hadde det ikkje vore rått om Zelda ikkje lenger var prinsesse, men folkevalgt president som måtte kjempe for å bli gjenvald? Der Link som The Chosen Hero hadde tilgong til å bruke elektronikk for å nå måla sine? Der hovudtransportmetoden ikkje var båt eller fugl eller hest, men T-banen?

Eg trur det. Eg trur det hadde vore heilt fantastisk. Og sjølv om eg sannsynlegvis tar feil i det meste av dette, er dette det Zelda-spelet eg håper at kjem til å dukke opp på Wii-U på eit tidspunkt i ikkje alt for fjern framtid.

Lyst til å le av meg fordi teoriane mine er så latterlege og dele dine eigne, hundre gonger betre, teoriar? Det er det kommentarfeltet er til for. Bruk det.